Այն, որ եղանակը ցրտելու է, և օդի ջերմաստիճանը նվազելու է, Գ. Սուրենյանը օրեր առաջ իրազեկել էր հանրությանը, սակայն նա նախորդ անգամվա նախազգուշացումը չէր արել, թե հնարավոր են ցրտահարություններ:
Այս գիշեր ոչ միայն եղանակը ցրտել է, ջերմաստիճանը նվազել է, այլ նաև շատ մարզերում բավականին տեղումնառատ է եղել, ավելին՝ բավականին ձյուն է եկել:
Գ. Սուրենյանը սոցցանցային գրառմամբ խնդրել է իր հետևորդներին և ընկերենրին իր գրառման մեկանաբանությունների բաժնում տեղադրել իրենց բնակավայրերի լուսանկարները, եթե այնտեղ ձյուն է եկել:
Նրա հետևորդների տեղադրած լուսանկարների հիման վրա կարելի է եզրակացնել, որ ունենք բավականին հետաքրքիր պատկեր. շատ վայրերում, ինչպես օրինակ՝ Ստեփանավանում, Սիսիանում, Դիլիջանում, Ծովագյուղում, Լուսաղբյուրում, Մարգահովտում և այլուր բավականին հաստ շերտով ձյուն է տեղացել, գոյացել է ձյունածածկույթ:
Փաստորեն ձյունով պատվել են արդեն ծաղկած ծառերն ու բացված ծաղիկները: Հետևանքների մասին դեռ չկա պաշտոնական հայտարարություն:
