Ընթացիկ ճակատագրական օրերին բոլորիս ողջ ուշադրությունն ու մտայնությունները կապված են սահմանային գոտու, առաջնային գծում պայքար մղող մեր հերոս սահմանապահների հետ:
Հերոսական տղաների հետ մշտական շփումների մեջ են մեր տեղեկատվական ոլորտի աշխատողները՝ լրագրողները, ովքեր զրուցում ու պարբերական կերպով հանրայնացնում են իրենց պատրաստած ռեպորտաժները:
Հատկանշական է, որ մեր զինվորները մշտապես բարձր տրամադրությամբ ու հզոր, ոգեշունչ խոսքերով են հանդես գալիս տեսանյութերում:
Ակնհայտ է, որ մեր հերոս տղաների մոտ շատ բարձր է իմացական ու գիտակցական մակարդակը:
Գնահատելի է նաև այն փաստը, որ զինծառայողների մոտ շատ բարձր է նաև հումորի զգացումը: Նրանք իրենց խոսքով ոչ միայն ուժի և խելքի դրսևորումներով են հանդես գալիս, առաջիկա հաղթանակների հաստատակամություն են հայտնում, այլ նաև փայլում են իրենց հումորային արտահայտություններով:
Նրանք պատվիրում են իրենց մայրիկներին, հայրիկներին, տատիկներին չմտահոգվել, նախապատրաստել իրենց սիրելի ուտելիքները, քանզի նրանց վերադարձի օրը ամենևին էլ սարերի ետևում չէ, շատ մոտ է:
